Але Будслаў у кожнага свой. У Евангеллі паводле Св. Мацвея знаходзім такія словы: “Бо дзе скарб твой, там будзе і сэрца тваё”. Для нашай парафіі Будслаў асаблівы, да яго прывязаныя нашыя сэрцы, тут мы адпачываем душой і целам, таму што нашы парафіяне маюць шчасце ўбачыць ціхі Будслаў і зазірнуць у блакітныя вочы Нябеснай Матулі, Якая пазірае са Свайго цудоўнага абраза на ціхі і амаль пусты касцёл.
Вось і заканчваецца лета, а з ім застаюцца ў памяці пілігрымкі і рэкалекцыі для хору, дзяцей і моладзі нашай парафіі ў Будславе. Сваімі выказваннямі на тэму, чым для кожнага з нас асабіста з’яўляецца Будслаў, падзяліліся дарослыя і моладзь нашай парафіі.
Будслаў для мяне – гэта адпачынак ад штодзённасці. Як адпачынак, так і ўзрост духоўны. Еднасць аднадумцаў, еднасць, супольнасць, аб’яднанне ў адну вялікую сям’ю. Аксана Бажко
Будслаў для мяне – гэта ўспамін з дзяцінства… гэта глыток з крыніцы жыцця… гэта сустрэча з дзіўнымі людзьмі… гэта надзея. Алена Несцяровіч
Будслаў для мяне – гэта час сустрэчы з Маці Божай у сваім цудоўным абразе, час спаткання з сябрамі, час новых знаёмстваў, аднаўлення сіл духоўных і фізічных! Увесь год чакаеш канец жніўня=) Вераніка Церах
Будслаў для мяне – гэта мая Радзіма. Гэта магчымасць пераадолець маю цемру ў пытаннях веры, хаця б часткова. Анна Уладыка
Будслаў - гэта тое месца, дзе можна адчуць супакой, набрацца духойнай моцы, выпрасіць неабходных ласкаў для сябе і сваіх блізкіх... Алена Герко
Будслаў для мяне – гэта месца, дзе можна адпачыць душой і целам, дзе можна ў цішыні заглянуць у сваё сэрца перад цудоўным абразом Маці Божай Будслаўскай.Тут можна правесці час, напоўнены радасцю, і знайсці для сябе карысную навуку жыцця… Аляксандр Верамей
Будслаў для мяне - гэта насамрэч асаблівае месца, гэта месца нараджэння і ўсталявання маёй духоўнасці. Першая пешая пілігрымка ў маім жыцці стала першым асэнсавным, няхай і маленькім, але крыжыкам, які так радасна было несці на сваіх плячах. Потым быў фэст у Будславе, які адкрыў для мяне сапраўднае адзінства вернікаў і прыгажосць малітвы, якую ўзносяць тысячы людзей разам...І як бы сёння не крытыкавалі Будслаўскія ўрачыстасці, святасць і веліч гэтага месца немагчыма скасаваць. Будслаўскія рэкалекцыі... яны наогул сталі для мяня школай пазнавання малеканькай касцёльная супольнасці, дзе кожную радасць, як і кожны абавазяк шчыра дзеліш з сябрам... Яўгенія Галомзік
Будслаў для мяне – гэта месца, з якога распачалося знаёмства з Богам, месца, дзе я заўсёды шчаслівая, месца, дзе я сустрэла сваё каханне! Маці Божая Будслаўская, маліся за нас… Святлана Раманюк
