Увечары вернікі нашай парафіі сабраліся на Літургію Вячэры Пана, якая ўзгадвае Апошнюю вячэру Езуса з вучнямі. У гэты дзень Касцёл успамінае ўстанаўленне Езусам Сакрамэнту Эўхарыстыі і святарства.

Напачатку Літургіі дзеці ад імя ўсёй парафіі павіншавалі нашых душпастыраў з гэтым успамінам, падзякавалі ім за ахвярнае служэнне і пажадалі быць па-сапраўднаму шчаслівымі святарамі. Таксама парафіяне асаблівым чынам падзякавалі пробашчу парафіі кс. Аляксандру, які ўжо 15 год ахвярна і рупліва нясе служэнне на Вілейскай зямлі.

У Літургіі слова вернікі разважалі над наказам братняй любові, які Езус пакінуў нам падчас Сваёй Апошняй вячэры.

Напрыканцы Св. Імшы Езус Эўхарыстычны быў урачыста перанесены ў падрыхтаванае месца адарацыі “цямніцу”, якая нагадвае аб арышце Хрыста ў Аліўным садзе і праведзеную ў вязніцы ноч.

Фота Аксаны Бажко