Напачатку маладыя пілігрымы наведалі адзіны ў Беларусі незвычайны музей Бібліі ў Баранавічах. Дзякуючы экскурсіі, цікавым аповедам і незвычайным экспанатам дзеці мелі магчымасць здабыць новыя веды, наблізіцца да культуры, гісторыі і геаграфіі Святой Зямлі, а таксама нанава прачытаць для сябе некаторыя старонкі Бібліі. У доме манахаў Місіянераў Божага Слова, дзе знаходзіцца музей, пілігрымы мелі супольнуную малітву, а таксама знаёмства з галоўным дырэктарам часопіса “Дыялог” Карнэліям Консэкам.

Пасля музею дзеці накіраваліся ў Касцёл Маці Божай Фацімскай і дом сясцёр Місіянерак Святой Сям’і, якія накармілі пілігрымаў смачным абедам.

З Баранавіч дзеці паехалі ў Нясвіж. Найперш яны наведалі адну з найбольш прыгожых святынь Беларусі – Касцёл Божага Цела. Пробашч мясцовай парафіі кс. Пётр Шарко распавёў пра гісторыя Касцёла, радавога магільнага склепу князёў Радзівілаў і самаго Нясвіжа. Аповед асабліва спадабаўся дзецям, бо быў напоўнены цікавымі паданнямі і легендамі пра крыпту-пахавальню Радзівілаў.

Пасля экскурсіі пілігрымы мелі ў гэтым касцёле Св. Імшу, якую цэлебраваў пробашч нашай парафіі кс. Аляксандр. Пасля Эўхарыстыі дзеці мелі час пахадзіць па Нясвіжскаму парку і набыць рэлігійныя рэчы. Пілігрымы сустрэліся з кс. Андрэем Калядка, які калісьці дапамагаў у нашай парафіі ў якасці дыякана, а цяпер служыць вікарыем у Нясвіжы.

Але на гэтым сюрпрызы не скончыліся: далей дзяцей чакаў салодкі пачастунак, які выпякла настаўніца па рэлігіі Анна, і забаўляльны парк са шматлікімі цікавымі атракцыёнамі.

Такая незвычайная пілігрымка ўзбагаціла дзяцей новымі ведамі і ўражаннямі і стала духоўным падмацаваннем у далейшым жыцці з Богам.

Надзея Смажанкова