Новапрэзбітэр Павел Трон паходзіць з нашай парафіі, нарадзіўся 15 снежня 1989 года. З дзяцінства наведваў касцёл, служыў пры алтары як міністрант, наведваў урокі рэлігіі, дапамагаў пры святыні сваёй працай і прымаў актыўны ўдзел у жыцці парафіі. У мінулым годзе, 25 кастрычніка 2015 г., атрымаў дыяканскае пасвячэнне з рук дапаможнага біскупа нашай архідыяцэзіі Юрыя Касабуцкага, а ў 2016 годзе скончыў Міждыяцэзіяльную вышэйшую духоўную семінарыю ў Пінску.

Падчас св. Імшы было таксама ўдзелена дыяканскае пасвячэнне Аляксею Пілівічу, які будучы клерыкам некаторы час праходзіў душпастырскую практыку ў нашай Вілейскай парафіі.

У гаміліі арцыбіскуп Тадэвуш Кандрусевіч разважаў пра абавязкі дыякана і святара. Мітрапаліт адзначыў, што святар пакліканы па прыкладу Езуса быць пасрэднікам паміж Богам і людзьмі. Іерарх звярнуўся да новага святара і дыякана з заахвотай прыняць гэтыя пасвячэнні як дар Юбілейнага Года Божай Міласэрнасці і несці Божую Міласэрнасць у сваім служэнні.

Напрыканцы Эўхарыстыі кс. Павел падзякаваў Богу, бацькам, ксяндзу-пробашчу нашай парафіі Аляксандру, семінарыйным выкладчыкам і ўсім прысутным.