А 10 гадзіне арцыбіскуп Тадэвуш сустрэўся з вернікамі Вілейскай парафіі Узвышэння Святога Крыжа, удзяліў Сакрамэнт Канфірмацыі 120 парафіянам і прыняў у міністранты 7 хлопцаў, якія жадаюць дапамагаць у якасці літургічнай службы алтара.
У гадзіну Божай Міласэрнасці, а менавіта ў 15.00, арцыпастыр наведаў парафію ў в. Любань, якая зарэгістраваная пад тытулам Божай Міласэрнасці. Як адзначылі самі вернікі, парафія з’яўляецца “сіроткай”, бо не мае свайго Касцёла, таму вернікі збіраюцца на супольную малітву каля прыдарожнага крыжа, у хатах парафіянаў і прыязджаюць на нядзельныя Св. Імшы ў Вілейку. У гэтым годзе вернікі Любанскай парафіі аднавілі прыдарожны крыж і выказалі сваё жаданне і намер распачаць будову Касцёла. Ксёндз-пробашч Аляксандр Барыла ўжо сабраў неабходныя дакументы і атрымаў згоду дзяржавы на распачацце будовы. Кс. Аляксандр адзначыў: “Падмуркам парафіі з’яўляюцца людзі старэйшага ўзросту, многія ўжо адышлі да Бога, але тут ёсць і моладзь, дзеці, а гэта значыць, што ў нас ёсць будучыня”.
Арцыбіскуп Тадэвуш Кандрусевіч асвяціў новы прыдарожны крыж і месца для будовы святыні. Іерарх разам з парафіянамі памаліўся Вяночак да Божай Міласэрнасці і прамовіў сваё слова. У разважанні Мітрапаліт закрануў тэму Крыжа і збаўлення, якога “Бог прагнуў больш за чалавека”, а таксама заахвоціў вернікаў прыняць крыж па прыкладу Св. Андрэя. Напрыканцы сустрэчы арцыбіскуп удзяліў вернікам Любанскай парафіі пастырскае благаслаўленне на далейшае жыццё і распачацце справы пабудовы Касцёла.
https://vilejka-kasciol.by/index.php/naviny/item/893-asvyachenne-prydarozhnaga-kryzha--v-lyuban#sigProGalleriaae05784cca