У чарговы раз Пан Бог дае нам шанс наблізіцца да Яго  праз Сакрамэнт Споведзі і Слова, скіраванае да нас праз ксяндза рэкалекцыяніста. Сёння кс.Юрый засяродзіў нашу ўвагу на наступных словах Святога Евангелля, якія мы пачулі ў часе Святой Імшы : “Сапраўды, сапраўды кажу вам: калі хто захоўвае Маё слова, той ніколі не ўбачыць смерці” (Ян 8, 51).  “Маем такі вялікі дар ад Пана Бога- казаў кс.Юрый- вечнае жыццё, а так баімся смерці.” Чалавецтва ўпэўнена, што само сябе знішчае. Столькі размоў пра Апакаліпсіс, столькі разоў вызначаны яго тэрмін , а таксама розныя прычыны канца свету! І чалавек траціць спакой, нават упадае ў адчай ад немагчымасці што-небудзь змяніць, стрымаць, ад свайго бяссілля. Бо спадзяецца толькі на сябе, на свае сілы. І нават не дапускае думкі, што ўсё можа змяніць Пан Бог, бо Ён Усемагутны. Даверыцца Пану Богу, прыняць Яго волю, адчуць Яго айцоўскую любоў – вось што патрэбна нам  і чаго Ён, добры і міласэрны Айцец наш,  увесь час чакае ад нас. Даў нам жыццё і ўсё, што вакол, стварыў для нас. Мы ж у пагоні за часовымі каштоўнасцямі ці прыемнасцямі забываемся пра гэта, часта губячы, знішчаючы  Яго творы на сваім жыццёвым шляху.

Пан Бог паслаў свайго Сына, каб  расказаў нам пра Яго міласэрнасць. А цяпер Міласэрны Бог чакае, каб мы аказвалі міласэрнасць да нашага акружэння,  да   людзей з нашага асяроддзя. "Будзьце міласэрныя, як Айцец наш міласэрны…”  Такія разважанні прыходзяць на думку пасля сённяшняй навукі ксяндза рэкалекцыяніста.

Закончыўся першы дзень рэкалекцый , але  яны працягваюцца (расклад у аб’явах). Не змарнуем жа час святых рэкалекцый, благаслаўлёны час!  І заахвоцім да ўдзелу нашых родных і знаёмых.