Падчас Эўхарыстыі мы дзякавалі Богу за час летняга адпачынку і прасілі Божага благаслаўлення на новы навучальны год для дзяцей і моладзі, бацькоў і настаўнікаў. Падчас гаміліі кс. Аляксандр прапанаваў паразважаць над параўнаннем чалавека з губкай, якая ўпітвае ўсё, што яе атачае. Пробашч звярнуўся да дзяцей з заахвотай, каб у гэтым навучальным годзе набірацца толькі дабра і адкідваць ад сябе ўсё злое. Напрыканцы Св. Імшы адбылося асвячэнне школьных прыладаў і індывідуальнае благаслаўленне ўсіх дзяцей праз малітву і ўскладанне рук святароў.

Падчас парафіяльных аб’яваў пробашч парафіі зачытаў усе сёлетнія катэхетычныя групы, а пры выхадзе з Касцёла раздаваліся анкеты на катэхезы. Заняткі па рэлігіі ў нашай парафіі пачнуцца з кастрычніка. Пробашч парафіі кс. Аляксандр заахвоціў ўсіх бацькоў, бабуль і дзядуль зрабіць ўсё магчымае, каб усе дзеці і моладзь парафіі развіваліся і раслі не толькі фізічна і інтэлектуальна, але і духоўна, праз удзел у катэхезах і нядзельных і ўрачыстых Св. Імшах.

“Калі з малодшых гадоў дзеці будуць выхоўвацца ў пабожнасці і навуцы, можна чакаць, што ўсё іх жыццё будзе шчаслівым”. Св. Юзаф Каласанс, занавальнік манаскага ордэну Піяраў (Ордэн Пабожных школ).