Радасць малодога святара раздзялілі святары, навучэнцы Міждыяцэзіяльнай вышэшай духоўнай семінарыі імя св. Тамаша Аквінскага з Пінска, і шматлікія вернікі. Удзельнікі літургіі напачатку сабраліся каля бацькоўскага дома ксяндза прыміцыянта, а пасля ўрачыстай працэсіяй накіраваліся да касцёла. У прывітальным слове напачатку св. Імшы кс. Аляксандр Барыла, пробашч Вілейскай парафіі, падкрэсліў, што кс. Кірыл Бардонаў з’яўляецца першым святаром у сучаснай гісторыі, які паходзіць з Вілейкі. Прыміцыянт ахвяраваў Святую Імшу за парафіяльную супольнасць і за ўсіх сваіх дабрадзеяў. Ксёндз Юрый Касабуцкі падчас казання завярнуў увагу на важнасць малітвы за святароў і на тое, што выхаванне святара пачынаецца з самага дзяцінства ў родным асяроддзі. Напрыканцы Імшы прадстаўнікі парафіі з розных узроставых груп павіншавалі і склалі шчырыя пажаданні прыміцыянту. Кс. Кірыл Бардонаў падзякаваў усім, хто раздзяліў з ім асаблівы момант у яго жыцці. Потым святар удзяліў прыміцыйнае благаслаўленне. Працягам урачыстасці стаў канцэрт гурта “Подых Духа” з семінарыі ў Пінску, які адбыўся ў раённым Палацы культуры. Затым каля парафіяльнага дома прайшла сустрэча прыміцыянта з парафіяльнай супольнасцю і запрошанымі гасцямі.

А.К.