Рэкалекцыі  распачаліся  Святой Імшой. Тэмай сёлетніх рэкалекцый была творчасць. Разам з клерыкам Юрыям удзельнікі хору разважалі над хрысціянскай творчасцю, ці не супярэчыць творчасць хрысціянскай духоўнасці, ці дастаткова толькі аднаго талента для творчасці. Асобная ўвага была нададзена  творчасці ў хрысціянскай супольнасці. Вельмі цікава праходзіла абмеркаванне тэмы”Збаўленне і творчасць”, падчас  якога разглядаліся  два асобныя тыпы людзей: людзі творчыя і людзі, дбаючыя пра збаўленне . Разважанні прывялі да высновы: толькі спасцігаючы прыгажосць створанага свету і шукаючы першакрыніцу  творчасці  асоба творчая можа ўзрастаць духоўна. 

Падчас рэкалекцый кожны з удзельнікаў меў магчымасць індывідуальна ўшанаваць Маці Божаю, падзякаваць Ёй, наблізіўшыся да абраза, а падчас адарацыі Найсвяцейшага Сакраманта кожны атрымаў асабістае  благаслаўленне. Гэтыя дні  ў Будславе былі напоўнены малітвамі і разважаннямі ці то падчас Крыжовага шляху, ці то падчас адарацыі альбо Ружанцовай малітвы.

Быў таксама час  і на супольны адпачынак у летні надвячорак, калі калбаскі з вогнішча былі такімі смачнымі, халодны кавун прыемна спаталяў смагу, а над  Будславам  у неба ўзляталі спевы. Напрыканцы ўдзельнікі рэкалекцый дзякавалі Пану Богу за гэтыя, так каштоўныя, дні духоўнага ўмацавання  побач з абразом Маці Божай Будслаўскай. 

Закончыліся рэкалекцыі, але тэма, закранутая падчас канферэнцый сталася  хатнім заданнем для ўдзельнікаў хору: у супольнасці развіваць творчы дух, імкнучыся да падабенства са Створцам, спевамі сваімі праслаўляць Пана Бога сёння, заўтра і заўсёды… 

Галіна Аляшкевіч

Фота Аксаны Бажко, Яўгеніі Галомзік