А што мне як святару, найбольш дапамагае перажываць Вялікі Пост? Што мне рабіць, каб добра перажыць Вялікі Пост? Дарагія браты і сёстры распачаўся новы перыяд у Касцёле – Вялікі Пост, кожны з нас робіць якія-небудзь пастановы, задумваецца над сваім жыццем, і прыкладае ўсе намаганні, каб як мага лепш перажыць гэты час. Трэба ўсвядоміць, што кожны з нас з’яўляецца грэшным чалавекам. Быць грэшнікам – гэта не значыць быць чалавекам подлым, нядобрым, злым, але як гаворыць Папа Францішак „быць грэшнікам, гэта добра знаць сябе, і ведаць, што я слабы, прызнацца ў сваёй слабасці”. Слабасць не з’яўляецца няшчасцем, наадварот, гэта шанс, можна сказаць, благаслаўленне. Чалавек абвясціўшы сябе слабым, як гаворыць Айцец Святы Францішак адкрываецца на іншых людзей, а гэта значыць і на Бога. Хтосьці просіць аб прабачэнні, але тым самым вучыцца прабачаць. Просіць аб дапамозе, але сам прыходзіць на дапамогу. Пакутуе ад злачынстваў, але тым больш атрымлівае асалоды ад жыцця. Любіць час, не баіцца пераменаў, бо ведае, што дабро не скончыцца. Усё ў руках Божых.
Дарагі сябра, як перажыць добра Вялікі Пост? Тое, што я скажу можа быць вельмі простым, на першы позірк, але як складана практыкаваць у паўсядзённым жыцці! Па першае, як гаворыць Хрыстус: „гэта наказваю вам, каб вы любілі адзін аднаго”(Ян 15,17), а па другое „калі вы будзеце адпускаць людзям правіны іхнія, то Айцец ваш Нябесны адпусціць і вам. А калі не будзеце адпускаць людзям, то і Айцец ваш не адпусціць вам правінаў вашых”(Мц 6, 14-15). Бог заклікае кожнага з нас да навяртання, да таго, каб мы зрабілі рэвалюцыю свайго сэрца, як кажа прарок Ёэль „Разрывайце сэрцы вашыя, а не вашае адзенне, і навярніцеся да Пана Бога вашага, бо Ён ласкавы і міласэрны, доўгацярплівы і шматміласцівы, неахвочы да пакарання”(Ёэл 2, 13). Хочацца пажадаць вам сябры, каб перамену свайго жыцця не адкладвалі толькі на Вялікі Пост, альбо Адвэнт, але каб практыкавалі штодзённа.
Кс. Андрэй Калядка