У гэты дзень нашу парафію наведаў таксама і дырэктар Дабрачыннага каталіцкага таварыства «Карытас» Мінска-Магілёўскай архідыяцэзіі кс. Аляксандр Фамяных, які калісьці служыў у нашай парафіі дыяканам.

Напачатку Эўхарыстыі ксёндз-пробашч Аляксандр шчыра прывітаў усіх парафіянаў і гасцей, усіх тых, хто паходзіць з Вілейскай парафіі, і нягледзячы на тое, што цяпер жыве ў іншым месцы, на фэст прыязджае ў родную парафію. У сваёй прамове ксёндз-пробашч адзначыў, што Крыж Хрыста – гэта алтар, на якім здзейснілася Ахвяра нашага збаўлення.

У гаміліі кс. Кірыл распавёў гісторыю свята Узвышэння Св. Крыжа і адзначыў,  што Крыж можа несці толькі той, хто апрануты ў духоўную вопратку пакоры. Крыж, як сказаў кс.Кірыл, дазваляе нам узнесціся над сваёй штодзённасцю і над самой смерцю. Святар прапанаваў паразважаць над прыкладам Езуса Хрыста, Які прынізіў Самога Сябе, стаўшы чалавекам, і аддаў за нас Сваё жыццё. Напрыканцы гаміліі кс. Кірыл дадаў, што свята Узвышэння Св. Крыжа заахвочвае нас трымацца Крыжа, у якім абяцанне таго, што дабро пераможа.

Св. Імша завяршылася эўхарыстычнай працэсіяй вакол нашага Касцёла. А пасля Св. Імшы дзеці і моладзь парафіі паказалі невялікую інсцэніроўку на тэму каштоўнасці жыцця і яго абароны. Гэта тэатральная пастаноўка заняла чацвёртае месца і была асабліва адзначана журы на Міжнароднай Парафіядзе ў Варшаве. Яе змест падкрэслівае вялікую каштоўнасць кожнага жыцця, якое пачынаецца ўжо ад моманту зачацця. Жыццё – гэта вялікі дар ад Бога, і прыгажосць жыцця заключаецца ў самім жыцці!